Serbia | Croatia | Montenegro | Bosnia and Herzegovina

Nisma e të Rinjve për të Drejtat e Njeriut në Serbi (YIHR Serbia) dhe Nisma e të Rinjve për të Drejtat e Njeriut – Kosovë (YIHR Kosovë) dënojnë aktin e frikësimit të BIA-s kundrejt gazetarit kosovar Adriatik Kelmendi, si dhe mesazhet e urrejtjes dërguar një familjeje shqiptare nga Bori, në dhjetor të këtij viti. Frikësimi i shqiptarëve shkon kundër nismave të bashkëpunimit rajonal si Ballkani i Hapur dhe mund të shkaktojë një bojkot tjetër nga komuniteti shqiptar gjatë regjistrimit të popullsisë në Serbi në vitin 2022. Në përputhje me këtë, kërkojmë që kryeministrja e Serbisë, Ana Brnabiq dhe përfaqësuesi i BE-së, Miroslav Lajçak, të dënojnë këto sulme, si dhe nga prokuroria dhe policia në Serbi që urgjentisht dhe në mënyrë efikase të hetojnë këto raste dhe t’i japin fund praktikës së mos-ndëshkimit.

Sipas Koalicionit për KOMRA, tash e disa vite inspektorët e BIA-s zhvillojnë intervista informative me gazetarin Adriatik Kelmendi, i cili është përkrahës publik i Koalicionit për KOMRA dhe Drejtor i televizionit Klan Kosova me qendër në Prishtinë, në aeroport ose pas arritjes së tij në Beograd, duke e marrë në pyetje dhe kërkuar arsyet e ardhjes së tij dhe pikëpamjet politike.

Një rast tjetër janë edhe mesazhet e urrejtjes drejtuar një familjeje shqiptare nga Bori, siç raportoi media Ist më 12 dhjetor të këtij viti. Mbishkrimet si “Vraj shiptarët”, “Shiptar muti”, “Shiptar muti nr. 1, dil nga Serbia” u shfaqën në një nga ndërtesat në rrugën Albanske Spomenice në Bor. Mesazhi i është dërguar drejtpërdrejt familjes që prej gjashtë vitesh jeton në atë pallat dhjetëkatësh. Ndonëse Kryebashkiaku i Borit e dënoi këtë akt dhe i bëri thirrje policisë të reagojë, deri më sot nuk ka informacione nëse ata që kanë shkruar këto mesazhe janë arrestuar. Vetëm dy ditë më vonë, Ivica Daçiq tha në Bor se Nikolla Shainoviq, i dënuar për krime lufte kundër shqiptarëve në Kosovë, “do të kujdeset për interesat e qytetit dhe të rajonit para SPS-së”.

Këto sulme dhe mesazhe vijnë si pasojë e drejtpërdrejtë e një shtetit të kapur që kultivon shovinizëm ndaj minoriteteve të ndryshme, veçanërisht ndaj atij shqiptar. Në vend të dënimit të dhunës dhe gjuhës së urrejtjes, ministri i policisë vazhdon t’i quaj shqiptarët “shiptari” dhe mohon krimet e luftës ndaj shqiptarëve – veçanërisht masakrën në Reçak. Për dështimin e përndjekjes tregon edhe fakti që Gjykata e Apelit në Beograd ka miratuar dje vendimin për anulimin e padisë së Këshillit Kombëtar të Pakicës Kombëtare Shqiptare kundër ministrit Vulin për shkak të përdorimit të termit “shiptari”. Kujtojmë se Gjykata e Apelit konfirmoi aktgjykimin e shkallës së parë të Gjykatës së Lartë në Beograd për padinë e Anita Mitiq, ish-drejtore e YIHR Serbi, kundër Informer-it dhe në shpjegimin e aktgjykimit njohu qartë përdorimin e termit “shiptari” si gjuhë e urrejtjes.

Ashtu siç u arrestuan personat që dogjën flamurin serb në Tiranë para mbledhjes së liderëve në kuadër të nismës Ballkan i hapur, është e drejta jonë të kërkojmë nga autoritetet serbe që BIA të ndalojë këtë lloj frikësimi ndaj z. Kelmendi, si dhe të gjejë sulmuesit që kërcënuan familjet në Bor.

Leave a Reply

Your email address will not be published. Required fields are marked *