Nisma e të Rinjve për të Drejtat e Njeriut Kosovë i është bashkuar organizatave të tjera joqeveritare në dërgimin e letrës drejtuar Kryeprokurorit të Shtetit në lidhje me publikimin e përgjimeve.
Duke u thirrur në parimet e ndarjes dhe pavarësisë së pushteteve, në autoritetin dhe përgjegjësinë e Prokurorit të Shtetit për sundim të ligjit dhe ndjekjen e veprave penale, ne organizatat jo-qeveritare, kërkojmë nga institucioni i Prokurorit të Shtetit, që në mënyrë të paanshme dhe konform mandatit kushtetues dhe ligjor:
Të veprojë me efikasitet, diligjencë dhe profesionalizëm në hetimin e këtyre përgjimeve dhe të gjykojë nëse ka elemente të veprës penale të kryer nga zyrtarët shtetërorë dhe personat tjerë të përgjuar me vendim të gjykatës.
Të trajtojë këto materiale me urgjencë dhe të japë rezultate në afat sa më të shkurtër, në mënyrë që të mos e shkatërrojë përfundimisht besimin publik edhe ashtu mjaft të ulët në institucionet e drejtësisë.
Të jetë transparent dhe në vazhdimësi të mbajë publikun të informuar lidhur me progresin e hetimeve, gjetjet dhe hapat e mëtutjeshëm.
Të bashkëpunojë me Agjencinë Kundër-Korrupsion për të verifikuar rastet e emërimeve politike dhe të jashtëligjshme në bordet e ndërmarrjeve publike, të gjetura në hetimin paraprak të Agjencisë dhe të organizatave të shoqërisë civile.
Letra drejtuar Kryeprokurorit të Shtetit, z. Aleksandër Lumezi, mund të gjendet këtu.
Poashtu, përgjigjen e z. Lumezi drejtuar organizatave joqeveritare mund ta gjeni këtu.